Zameen Ke Aansu – Episode 11 | Mohabbat Ka Iqraar, Baap Ki Zid Aur Judaai Ka Dard

Episode 11

"Hoor, main tumhein kuch batana chahti hoon..."

Hania ne halka sa jhijakte hue kaha jab Hoor apne haathon par nail paint laga rahi thi.

"Ji Aapi, boliye na... kya baat hai?" Hoor ne muskurate hue jawab diya.

Hania ne gehri saans li. "Jab hum Murree mein thay... Hanan ne mujhe shaadi ke liye propose kiya."

"Kyaaa? Aapi sach mein? Aur aap ne kya jawab diya?" Hoor ne bechaini se poocha.

"Main ne abhi tak jawab nahi diya... main ne thoda waqt maanga hai."

"Waqt? Aapi is mein sochne wali kya baat hai? Aap Hanan se mohabbat karti hain. Aap ko haan keh dena chahiye."

Hania ne nazrein jhuka li. "Mujhe darr lagta hai... kahin unke ghar walon ne mujhe reject kar diya to?"

"Aisa kuch nahi hoga. Aunty to aapse kitni mohabbat se mili thin. Unhone kaha tha na ke aap unhein apni bichri hui behen jaisi lagti hain."

Hoor ki baaton ne Hania ko himmat di. Us ne faisla kar liya ke woh Hanan ko haan keh degi.

---

Iqraar-e-Mohabbat

"Hanan... mujhe aap ka proposal manzoor hai."

Hanan hairan reh gaya. "Sach?"

"Ji. Main khush qismat hoon ke mujhe aap jaisa insaan mila."

Hanan ne khushi se uska haath tham liya. "Main aaj hi Mom Dad se baat karta hoon. Bohat jald tumhein apni dulhan bana kar le jaunga."

Yeh sun kar Hania ki aankhon mein aansu aa gaye.

"Arre ro kyun rahi ho?"

"Mujhe apni Mama ki yaad aa rahi hai... kaash woh yahan hotin."

Hanan ne uska chehra apne haathon mein le kar kaha, "InshaAllah ek din tum zaroor unse milogi."

---

Toofan Ki Aahat

Lekin jab Hanan ne apne walid Arsalan Sahab ko Hania ke baare mein bataya, to ghar mein toofan aa gaya.

"Tumhari himmat kaise hui yeh sab sochne ki? Hum us larki ko apni bahu kabhi nahi banayenge!"

"Dad, main Hania se mohabbat karta hoon. Main shaadi karunga to sirf usi se."

"Warna kya?"

"Warna main yeh ghar chhod doonga!"

Ghar ka mahaul sakht ho gaya. Hanan ghusse mein wahan se nikal gaya.

---

Ek Shart...

Kuch der baad Arsalan Sahab khud Hania ke ghar pohanch gaye.

"Main tum jaise larkiyon ko achi tarah jaanta hoon. Ameer ghar ke larkon ko phansati ho."

"Nahi Uncle, main aisa kuch nahi chahti. Mujhe sirf Hanan chahiye," Hania ne haath jor kar kaha.

"Agar tum ne mera kaha na maana... to tum Hanan ki laash dekhogi."

Yeh sun kar Hania ke pairon tale zameen nikal gayi.

"Nahi! Main sab karungi jo aap kahenge. Bas unhein kuch mat kehna."

"To phir Hanan se kaho ke tum us se mohabbat nahi karti. Kaho ke tumhein sirf paisa chahiye."

Hania toot chuki thi... magar us ne haan kar di.

---

Qurbani

"Main tum se mohabbat nahi karti, Hanan Sikandar. Mera maqsad sirf paisa tha."

Hanan ko yakeen nahi aaya. "Yeh tum kya keh rahi ho? Zaroor koi baat hai. Please sach batao."

Magar Hania ne pathar dil bana liya.

"Agar mujh se shaadi karni hai to apne baap ki sari jaidad mere naam karo."

Chataaaak!

Hanan ka haath uske gaal par ja laga.

"Bas Hania! Main ne socha bhi nahi tha ke tum itni gir sakti ho. Aaj ke baad apni shakal mat dikhana. Nafrat hai mujhe tum se."

Woh use dhakka de kar chala gaya. Hania zameen par gir kar toot kar roti rahi.

Us ne apni mohabbat ko bachane ke liye apne aap ko qurbaan kar diya tha...

Lekin Hanan ko haqeeqat ka zara bhi andaaza nahi tha.

---

Jari Rahega...

Kya kabhi Hanan ko sach ka pata chalega?
Kya Arsalan Sahab ka asli chehra saamne aayega?
Aur kya yeh mohabbat phir se apni manzil paa sakegi?

Jaanne ke liye intezar kijiye Episode 12 ka...