Zameen Ke Aansu – Episode 8 | Picnic Ka Safar, RH Ka Paighaam Aur Mohabbat Ka Iqraar

Episode 8

"Hoor uth jao, jana nahi hai kya? Raat ko to itni khush thi aur ab tumhara sona hi khatam nahi ho raha."

Hania ne usay hila kar uthaya jo abhi tak gehri neend mein thi.

"Kya time hai Aapi?" Hoor ne aankhein band rakhte hue poocha.

"Paanch baj rahe hain larki."

"Kyaaa?" Hoor jhat se uth baithi. "Sirf ek ghanta reh gaya hai aur aap ready bhi ho gayi!"

Hoor ne Hania ko dekha to muskuraye bina na reh saki. Hania ne dark pink color ki long frock pehni hui thi jo paon tak thi. Gale mein silver dupatta, baal khule hue kandhon tak aa rahe the. Golden tops aur halka sa makeup uski khoobsurti ko aur nikhar raha tha.

"Bas bas, bohat ho gayi tareef. Ab jaldi se ready ho jao."

---

Thodi der baad neeche se car ka horn bajne laga.

"Hoor beta jaldi karo, Hanan kab se horn baja raha hai!" Hina Begum ne awaaz di.

Hoor ne pink frock pehni jo ghutnon tak thi aur black dupatta liya. Mascara, kajal aur halka sa pink blush laga kar woh bhi tayyar ho gayi.

"Mashallah meri beti bohat pyari lag rahi hai," Hina Begum ne maatha chuma.

Sab se ijazat lekar dono behne neeche aa gayin.

---

Safar Ka Aaghaz

"Agar ab bhi na aati na to chhor kar chala jata," Hanan ne mazaak mein kaha.

"Acha baba sorry!" Hoor ne hans kar jawab diya.

Hanan ne blue jeans aur blue shirt pehni hui thi, jisme woh kaafi handsome lag raha tha.

Car Islamabad ki sadkon par daud rahi thi. Mausam khushgawar tha, halki barish aur thandi hawayein chal rahi thin.

"College ki van kab niklegi?" Hanan ne poocha.

"Nau baje tak," Hoor ne ghari dekhte hue kaha.

---

Hania Ki Awaaz

"Aapi kuch ga kar sunao na," Hoor ne zid ki.

Hania pehle jhijhki, magar phir dheeme lehje mein gana shuru kiya:

Aaye ho meri zindagi mein tum bahar ban ke...
Mere dil mein yunhi rehna, tum pyar pyar ban ke...

Hanan uski awaaz mein kho gaya.

"Mashallah, bohat achi awaaz hai," usne dheere se kaha.

Hania sharma kar khidki ki taraf dekhne lagi.

---

College Mein Ek Aur Guldasta

College pahunchte hi ek chhota sa bacha Hoor ke paas aaya.

"Didi, ye aap ke liye kisi uncle ne bheja hai."

Phir se laal phoolon ka bouquet...

Card par likha tha:

Tujhe dekhte dekhte hum yun deewane ho gaye...
Tere husn ke hum parwane ho gaye... ❤

Meri pyari jaan, jald hi tumhein bata dunga ke main kaun hoon...
Tab tak apni picnic enjoy karo.
Tumhara RH.

"What rubbish! Aakhir kaun hai ye?" Hoor ne gusse mein bouquet zameen par phenk diya.

"Tum Hanan ko bata do," Hania ne kaha.

"Nahi Aapi, woh to usay jaan se maar dega!"

Hoor ne card phaad diya.

---

Pehli Nazar Ka Ehsaas

Van mein chadte waqt Hania ka paon phisla, magar Hanan ne foran use sambhal liya.

Dono ki nazrein pehli baar yun takraayi...

Hanan ne dheere se uske kaan ke paas kaha, "Aaj tum bohat pyari lag rahi ho. Pink color tum par bohat suit karta hai."

Hania ka dil zor zor se dhadakne laga.

"Hania, main tumse kuch kehna chahta hoon..."

Magar baat adhoori reh gayi. Safar ke dauran Hania ki aankh lag gayi aur uska sar Hanan ke kandhe par aa tikka.

Hanan bas use dekhta reh gaya.

Shayad use khud bhi ehsaas nahi hua tha ke kab woh Hania se mohabbat kar baitha.

---

Jari Rahega...

Na jaane Hoor ke saath kya ho raha tha. Kaun tha RH? Kya Rehan hi RH tha ya koi aur musibat uski muntazir thi?